升小話題：真係要越早開始了解各類學校🏫越好嗎？最遲K1 開始了解嗎？
今個星期六6月1號，對於部分19年度升小一嘅小朋友來說係非常重要嘅日子，小一放榜日。擔心派唔到心儀學校🏫嘅爸媽一定整理好文件為叩門一戰作準備。💪🏻
另外部分小朋友已有學位的亦不見得輕鬆，他們爸媽🧑🏻👩🏻可能希望叩入更心儀學校，所以仍然要整裝準備，隨時再上戰場參與叩門面試。💪🏻
而2020年入小一嘅小朋友亦開始為直私學校面試，家長亦開始去各學校簡介會了。 （大部分直私面試都喺K2尾K3頭考，包括K2升K3嗰年暑假期間內都有機會要去面試）
記得以前，媽媽👩🏻總覺得如果BB👶🏻手抱咁大已經睇學校🏫資訊嘅家長有點太緊張。但經歷過後才發現「早少少」慢慢看清楚更能夠不慌不忙地尋找到較為合適嘅學校。
(我們是大哥K1時開始慢慢了解小學資料的，因為唔太知道小學遊戲玩法，所以要花時間一邊消化遊戲規則一邊開始了解周邊嘅學校。
到咗今日其實覺得可以更早一點開始🧐了解更好！亦更覺得越不怪獸👾越要早看清，從而尋找到更合適嘅學校。因為很多學校嘅講座和體驗日都係用來推銷自己，學校透過介紹自己優勢、特色來吸引家長，每每讓家長看到好多光環💫，每去到一些校舍大又新，資源又豐富，更有個懂得推銷嘅校長👨🏻🏫或非常熱誠嘅校長👩🏻🏫的學校時更難抽身。初了解學校時的我每每亦被那些光環💫吸引，但是我們爸爸🧑🏻每當被那些光環照咗一次之後，便會沉澱一下學校嘅好壞。經爸爸客觀🤔分析後，每每我那種良好感覺就會減半，將我們嘅想法清晰化。)
#言歸正傳 ，正如之前所說的如果想有足夠時間認識多幾間不同嘅學校，的確早啲開始了解比較好，不論怪唔怪獸👾家長都好。或者像我們一樣最遲K1 升K2那年5月份或暑假左右要開始了，除非 #真係真係 入咩學校都無所謂吧。
不過，作為家長就算唔報直私，但點都要填自行份表或加埋大抽獎份表，所以無所謂極都要有幾個選擇要排要填，所以即是點都要了解下有興趣嘅學校。（谷校、開心校、共融校 等等，你喜歡那一類？其實說穿了沒有無所謂的家長，因為一睇幾類學校，可能爸媽已經有一個類型在心中，是吧？）
#不是怪獸 ，只想俾自己充裕時間了解香港那幾間比較合適自己孩子嘅學校。
部分能力許可嘅家長，合適自己孩子嘅學校更可以存在於世界任何一個地方。
成日話早啲開始了解好啲，主要原因係好多學校嘅開放日、體驗日或者簡介會多數同期甚至同日舉行(多數每年5月及9月比較多），因此到K2升K3個年至開始了解的話，到時就分身不下了。去學校參觀前，更可以先從心儀學校網站或其他途經了解多啲，再看準時機報其開放日或簡介會作考量之用。
要知道開放日或簡介會資訊的話，真係要續間學校網頁睇或留意各大社交群組資訊，mark底開報日子同時間，如果想報到簡介會，真係要喺開報嗰日準時提前5-10分鐘stand by曬電腦電話，重要入好曬所需畫面，因為部分熱門學校通常開報15分鐘之內已經FULL曬。而有部分學校用抽籤形式取得簡介會出席資格的，呢種形式就比較睇運氣。(不過，媽媽比較喜歡後者，因為不用太緊張開報日子時間，同時又可以借此機會知道同學校嘅緣份有幾深！哈哈！)
** 除左搵較心儀學校外，如果參加自行 又要計下自己小朋友有幾多分，再者 要大抽獎的話 又要計埋點排位...............
雖然準備升小嘅經驗上媽媽未算老手，但係因為呢幾年去過唔同學校聽簡介同參觀，慢慢地對選擇學校嘅諗法的確多咗另一種睇法。(認識咗不同學校後，不斷深思那一類學校適合自己家庭和孩子。發現真係唔一定人人話好就真係好，有時人地認為資源多、活動多、成績好、校舍大、近屋企等等因素就係好，但自己又係唔係咁諗呢？！好多人用升中成績嚟衡量學校好唔好，升中成績好就代表真係好？！人人話唔好嘅學校，又係唔係真係唔好？其實好多時家長對某類學校唔認識而存有偏見，可能學校被指嘅唔好只是某方面，其他部分或許做得好好。只係每每太注意某類熱門學校，而輕視咗其他類型學校嘅價值。
最開初了解學校時，媽媽亦被外界嘅資訊蒙蔽雙眼，會被師資豐富、活動多、校舍新又大嘅學校吸引。但慢慢地發現別人喜歡的真的不代表自己都喜歡，更發現比較鍾情校舍細同有歷史那類型，那怕比別人活動空間少、那怕比別人資源缺乏、那怕未來比其他學校更多未知數。説到尾，不論入讀什麼學校也好，每間學校都有好有壞，去到任何學校孩子們都有所得著，重點是途中有沒有父母 #適切的同行 吧！
在這裡預祝我們2019年升小學的小朋友們 都入到心儀嘅學校🏫！😊
題外話：如何做到與孩子適切地同行，媽媽覺得係一個 #非常非常非常 #深奧 及重要嘅一環，有高人可以指點迷津嗎？
(每人都有自己嘅想法和適合程度，此文章只是一則個人分享。謝謝！）
.
.
.
.
.
.
#全職媽媽 #香港媽媽 #升學 #小學 #面試 #放榜 #叩門 #選校
Search